Back
مشاهدة مشاركة واحدة (من مجموع 1)
  • الكاتب
    المشاركات
  • #9634
    admin
    مدير عام

    في داخل كل وحدة فينا ثروات كثيرة ربي خلقها لها و داخل كل واحد فينا منجم ذهب من الذكاء والراحة النفسية اذا دورنا عنه راح نلقاه , في باطن كل واحد فينا كنز ماله  حدود, اي شي تتمنينه و ودك فيه تقدرين تطلعينه من ذا الكنز.
    لكن مشكلتنا اننا متجاهلين الكنز ذا تماما او خلينا نقول مانعرف كيف وشلون نتحكم فيه, الكنز هو عقلك الباطن ماتحسين فيه لانك مو معطيته اي اهتمام.
     بس في الحقيقة هو له دور كبير في مشاعرنا , ذاكرتنا وحتى في وجودنا على قيد الحياة.
    عقلنا الباطن هو اللي يتحكم في التنفس لان العميلة تتم بدون ما حنا نتدخل في الموضوع لكن لو حاولنا نحبس انفاسنا هنا يكون دور عقلنا الواعي .
    العلاقة بين العقل الواعي واللاواعي (الباطن)
     للعقل مستويين اثنين العقل الواعي او العقلاني والعقل اللاواعي او اللاعقلاني, حنا نفكر بعقلنا الواعي واي شي نفكر فيه بإعتياد يروح مباشرة لعقلنا الباطن , عقلنا الباطن هو مركز العواطف والانفعالات والابداع اذا فكرنا بالخير راح يسحب معه الخيرواذا فكرنا بالشر برضو راح يسحب معه الشر.
    بعطيك مثال عشان اسهل عليك فهم العلاقة بين العقل الباطن والعقل الواعي عقلك الواعي شغله زي القبطان اللي في السفينه , هو اللي يوجه التعليمات  لافراد الطاقم ويدلهم على الطريق.
    فلنفترض ان القبطان اعطى اوامر خاطئة وبما انه اليد العليا افراد الطاقم ما راح يعصونه, هينا السفينة من الممكن انها تغرق وكل اللي على السفينه يهلكون والعكس صحيح.
    لذلك نقول ان العقل الواعي هو سيد العقل الباطن وعقلك الباطن ياخذ الاوامر من العقل الواعي سواء كانت ايجابية او سلبية وينفذها بدون اي نقاش ف لما ينفذ عقلك الباطن واجباته ماراح يهتم للمنطق او الاخلاق لكنه راح يعمل على الاوامر اللي بثيتيها له ويحققها لك بافضل النتائج.
    مثلا اذا اذا ارسلتي له افكار عن الصحة ف راح يحسسك بالصحة اما اذا ارسلتي له افكار عن المرض حتى ولو مافيك اي مرض ف راح يحسسك بالمرض من مبدأ لا تتمارضوا فتمرضوا.
    النقطة الرئيسية اللي لابد تتذكرينها وتحطينها ببالك هي ان طالما عقلك الباطن يقبل اي فكرة علطول يبدأ ينفذها حرفيا والحقيقة المدهشة بالموضوع ان قانون عقلك الباطن يتعامل مع افكار الخير والشر بالشكل نفسه وهذا القانون لما تطبقينه بالطريقة السلبية راح يخليك تفشلين وتنحبطين , واذا طبقتيه بطريقة ايجابية راح تستمتعين بالنجاح والصحة.
    عقلك الباطن هو الكنز اللي داخلك
    لو فهمنا عقلنا الباطن رح نقدر من خلاله نحقق كل هدف نتمناه لان بكل بساطة هو مسخر لنا مو علينا.
    سؤال بسيط .. من فينا ما ياكل؟
     كلنا, حلو . طيب لما نجي ناكل هل نفكر ب العضلات اللي نستخدمها في عملية الاكل؟ 
    لا
    ماقد فكرتي ليه كل ذا يصير من غير ماتفكرين فيه !!
     انا اقولك لان كل ذا مبرمج في عقلنا الباطن نتيجة خبراتنا السابقة على فعل ذلك كل الحركات اللي نسويها خلال اكلنا صارت تلقائية .
    لكن لو جينا للاطفال وطريقة اكلهم ف رح نلاحظ انهم لما ياكلون يحوسون الدنيا ويلطخون وجيههم بالاكل .
    هذا المثال يدل على ان بمجرد ما نعطي عقلنا الباطن اهداف محددة عن طريق العقل الواعي ويتبرمج في العقل الباطن زي ماتبرمج الاكل فيه رح نقدر نحققه في المستقبل بغض النظر عن طبيعة الاهداف اللي تشحنينه سواء كانت سلبية او ايجابية لان تحديد الخطأ من الصح وظيفة العقل الواعي والعقل الباطن ينفذ الاوامر فقط.
    تقدرين تكتسبين مهارة تشغيل عقلك الباطن اذا حطيتي اساس عمل واضح من البداية وتقدرين برضو تطبقين قوة عقلك الباطن عملي وتحققين النتائج والاهداف اللي انتي تبينها.
    كل افعالك وتجاربك واحداثك وظروفك اللي مريتي فيها ردود افعال عقلك الباطن لافكارك.
    الفكرة هي فعل ابتدائي ورد الفعل هي استجابة العقل الباطن لهذي الفكرة , اشغلي عقلك بالمفاهيم الايجابية زي السعادة , الصحة والسلام والنية السليمة وبتشوفين انعكاس كل هذي الافكار على حياتك وعلى نفسيتك.
    تخيلي عقلك  حديقة وانتي بستانية كل يوم تزرعين البذور اللي هي افكارك في عقلك الباطن على اساس افكارك المعتادة. اذا زرعتي الحب والسعادة راح تحصدين زرعك ذا في حياتك.
    قوانين العقل الباطن :
    – عقلك الباطن ما يعرف يفرق بين التصورات والمواقف الحقيقية مثلا:
     اذا كان عندك برزنتيشن في الجامعة وفي عقلك تخيلتي تقديمك للبرزنتيشن بشكل ممتاز لعدة مرات هينا عقلك الباطن راح يصدق انك بالفعل جالسة تقدمين البرزنتيشن ولما تجين تقدمينه راح تقدمينه بشكل ممتاز زي ما تخيلتيه.
    – اذا ارتسخ في عقلك الباطن شي معين او اعتقاد معين ف ذا الاعتقاد صعب انه ينمحى خصوصا اذا كان من فترة طويلة.
    – كل فكرة تؤدي لرد فعل جسماني مثلا اذا توقعتي ان فيك مرض معين في جزء معين من جسمك ردة فعل جسمك ان هذي المنطقة راح تبدأ تألمك.
    – اي شي تتوقعينه راح يتحقق مثلا اذا انتي توقعتي انك تنجحين في هذا المجال اللي انتي بادية فيه ف راح تنجحين بالفعل والعكس صحيح.
    اهمية التواصل بين العقل الباطن والعقل الواعي 
    العقل الباطن يعتبر بنك المعلومات والذكريات والرغبات ويمثل حوالي 90 % من العقل, يعني اي خلاف بين العقل الواعي والعقل الباطن راح يكون لصالح العقل الباطن , من قدرات العقل الباطن انه يقدر يسجل تقريبا 50 لقطة في وقت واحد بالمقابل العقل الواعي ما يقدر يسجل غير لقطتين مو اكثر.
    مثلا اذا كنتي تتكلمين مع احد معين ف عقلك الواعي يكون مركز على كلامه وعينه فقط اما عقلك الباطن راح يكون مركز على مظهره , الغرفة المحيطة فيكم , درجة الحرارة , اللون اللي لابسه وهلم جرا.
    طيب كيف اتحكم ب عقلي الباطن او كيف اوصله من الاساس؟
    من اهم الطرق اللي تخليك تتحكمين بعقلك الباطن وتبدين تزرعين فيه الايجابية والسعادة وراحة البال هو الايحاء الذاتي ؟
    معنى الايحاء في القاموس هو عمل او سلوك يستهدف وضع شيء ما في ذهن او عقل شخص معين.
    يعني الايحاء هي عملية عقلية من خلالها عقلك يبدأ يتقبل الفكرة اللي اوحيتي له بها ويحطها رهن التنفيذ.
    تذكري ان اي ايحاء توحين فيه لعقلك الباطن موب من الممكن انها تنفرض على عقلك الباطن بدون موافقة عقلك الواعي.
    الزبدة عشان عقلك الباطن يتقبل الافكار هذي ويبدأ يتشربها لابد ان عقلك الواعي يكون منسجم مع الفكرة من البداية ويتقبلها.
    مفتاح الايحاء الذاتي هو انك تتعلمين كيف تسيطرين على وظائف جسمك وتخلين جسمك واعصابك تسترخي من خلال الهمس و بمعنى اخر انك تهددين جسمك بكلمات وعبارات معينة بطريقة معينة وبتنفس بطيء.
    الايحاء يعالجك من امراض كثيرة سواء نفسية او حتى جسدية , العلاج بالايحاء مهوب شي جديد ولا هو مستحدث بالعكس هو من عهد القدماء المصريين , من خلال الايحاء تقدرين تقنعين جسمك بتوليد احاسيس معينة تخلصك من الضغوطات ومتاعب الحياة.
    فلنفترض ان عندك مشكلة اللي هي انك تحسين انك موب محبوبة من البنات اللي حولك لاي سبب من الاسباب , يجتمعون ويسحبون عليك , ما يقدرونك او يقللون من قدرك و ما يحترمونك , تحسين ان دمك ثقيل او ذوقك مو حلو هذي المشكللة سببت لك تعب نفسي وحزن وتبين تلقين لها حل باي طريقة وتكسرين الحاجز اللي بينك وبين البنات.
    السبب الرئيسي لاحساسك ذا ان في ما سبق صار لك موقف معين مع هالبنات فحطيتي ببالك انك موب محبوبة ورددتي الفكرة هذي بينك وبين نفسك لين اقتنعتي فيها وترسخت ببالك , بالتالي انعكس رأيك ذا اللي كونتيه عن نفسك والصورة اللي رسمتيها فيها نفسك على تصرفاتك , صرتي تبتعدين عن الناس وعلاقتك معهم متوترة وفي كل علاقة جديدة لك تتوقعين الفشل.
    الحقيقة انك اوحيتي لنفسك بالايحاء السلبي اللي انعكس على علاقاتك مع اللي حولك ثم على نفسيتك ويمكن صحتك وراحة بالك.
    الحل مع هذي المشكلة انك تستبدلين الايحاء السلبي ذا بالايحاء الايجابي , بالبداية ماراح يكون سهل عليك لكن حبة حبة راح تشوفين الفرق فيك اول ثم في اللي حولك.
    علم hypnoses او العلاج بالايحاء ويسمى بالتنويم المغناطيسي وهو اسم خاطئ , الاسم الصحيح هو علم الايحاء الذاتي وعشان اوضح لك الصورة اكثر , كلنا نمر بحالات اليقظة والنوم هينا يرسل المخ موجات كهربائية تحدد درجة اليقظة والنوم اللي نكون فيها وهي ثلاثة مراحل :
    1- البيتا : هي حالة اليقظة التامة والمخ يرسل حوالي 14 موجة / ثانية.
    2- الألفا : حالة ما قبل النوم او نهاية النوم او احلام اليقظة , الشخص في هذي المرحلة يكون واعي تماما لكن في حالة استرخاء شديد وتتميز هذي المرحلة بانها اعلى مرحلة يتواصل فيها العقل الواعي والباطن والمخ يرسل 8 موجات / ثانية.
    3- الدلتا : حالة النوم الكاملة.
    عشان يبدأ الاتصال بالعقل الباطن او عملية الايحاء الذاتي لازم نوصل لمرحلة الفا بارادتنا وبالوقت اللي حنا نحدده باختصار الايحاء الذاتي  يصير لما توصلين لمرحلة الفا.
    خطوات الايحاء الذاتي 
    ينقسم على ثلاث مراحل :
    – الاعداد
    – احداث الايحاء 
    – الاستماع للاقتراحات
    الاعداد :
    بحيث انك تسترخين بمكان هادي ومافيه اي صوت باضائة خفيفة وانا افضل اضاءة الشموع لانها تساعد على الاسترخاء ; تجنبي كل شي ممكن يشتت ذهنك سواء ملابس ضيقة , جوع او عطش. 
    احداث الايحاء:
    هدفنا هينا نوصل لمرحلة الفا زي ما قلت اعلاه وفيه اكثر من طريقة عشان توصلين لها الموضوع يختلف من شخص لاخر تقدرين تجربين كل الطرق وتختارين اللي يناسبك ويوصلك للمرحلة هذي.
    1- اجهاد العين بمعنى انك تركزين بنظرك على شي محدد بدون ما تغمضين
    2- اجهاد العقل مثلا انك تعدين من 1-100 بحيث انك تنقصين 3 بكل مرة مثلا 94-97-100 الخ
    3- استرخاء عقلي بالتخيل بحيث انك تتخيلين انك جالسة بمكان انتي تحبينه 
    4- الاسترخاء الجسدي المتزايد
    الاستماع للاقتراحات :
    قبل تبدين بالايحاء ككل لازم تكتبين اهدافك وطموحك والاشياء اللي تبين ترسلينها لعقلك الباطن والعادات السيئة  والهموم اللي ودك تتخلصين منها بورقة بعدين تحفظينها , غير كذا لازم تكون العبارات اللي تختارينها مدروسة بعناية مثلا ودك تنزلين وزنك قولي “جميل اليوم بديت افقد كثير من وزني الزايد وخلال هذا الشهر راح افقد 5 كيلو”  رددي العبارات اكثر من مرة بصوت هادئ وبثقة تامة بربك و بنفسك , اتركي فاصل بين كل عبارة والثانية وهذي اهم نقطة لان هذا الفاصل راح تستغلينه بالتركيز الكامل على الصورة الذهنية للعبارة اللي بثيتيها لعقلك الباطن وراح تترسخ ويبدأ عقلك يتبرمج عليها.
    كثير ناس يوحون لانفسهم بايحائات سلبية ويستغربون ليه حياتهم ماشية كذا وموب عارفين ان كل اللي يصير لهم بسبب ايحائاتهم السلبية اللي يشربونه لعقلهم الباطن بدون ما يدرون.
    لازم كلنا نفتح عيوننا على ذا الشي ونبدأ خطوة جديدة في حياتنا , نبدأ نرسل رسائل ايجابيه لعقلنا , نبدأ نحدد اهدافنا ونصر اننا نحققها مهما كانت الصعوبات وصدقيني ماراح يكون في صعوبات اذا برمجتي عقلك باهدافك لانه راح يسهل عليك كل عقبة تمرين فيها بطريقك لتحقيق حلمك.
    اكتبي بورقة مثلا مصممة الازياء فلانة او الدكتورة فلانة او او او وعلقي الورقة على لوحة طاولتك او اي مكان تقدرين تشوفينها فيه باستمرار عشان كلما تشوفين الورقة هذي تدخل الفكرة علطول لعقلك الباطن وتترسخ هناك.
    تبين تتحكمين بنفسيتك ! تحكمي بعقلك الباطن خلصيه من مشاكل الحياة وهمومها بجلسة استرخاء. 
    تحسين انك حزينة او سلبية حبتين ؟ ابدي امحي كل الافكار هذي واستبدليها بكمية من الافكار الايجابية اللي تخليك في اعلى مستويات السعادة , خلونا نرتقي بنفسياتنا ونرسم لاهدافنا طريق واضح و ننجح لان النجاح هدف يتمنى يحققه الجميع.

مشاهدة مشاركة واحدة (من مجموع 1)

يجب تسجيل الدخول للرد على هذا الموضوع. Login here